সোমবাৰ, ২ আগস্ট, ২০২১

NewsFile Institute
Home / বিনিয়োগ  / #দ্বিতীয় খণ্ড#

#দ্বিতীয় খণ্ড#

সমুদ্ৰজিত গোহাঁই,১৪ নৱেম্বৰ

‘বিনিয়োগৰ আদিপাঠ’ৰ প্ৰথম খণ্ডত (৮ নৱেম্বৰ,২০২০) আমি এজন সাধাৰণ ভাৰতীয় লোকৰ বাবে কিয় বিনিয়োগৰ প্ৰয়োজন হয়,সেই বিষয়ে প্ৰাৰম্ভিক ধাৰণা এটা দিবলৈ চেষ্টা কৰিছিলোঁ ৷ আমি প্ৰথম খণ্ডত উল্লেখ কৰিছিলোঁ যে মূলতঃ মুদ্ৰাস্ফীতিৰ ফলত হোৱা বিৰূপ প্ৰভাৱৰ পৰা হাত সাৰিবলৈ বিনিয়োগ কৰাৰ প্ৰথম প্ৰয়োজনীয়তা আহি পৰে ৷ বিনিয়োগৰ বিনিময়ত এজন ব্যক্তিয়ে যি লাভাংশ বা উপাৰ্জন কৰে,সেইয়া অন্ততঃ মুদ্ৰাস্ফীতিৰ হাৰতকৈ অলপ হ’লেও বেছি হোৱা উচিত ৷ আনহাতে যিমানে লাভাংশ বা উপাৰ্জনৰ হাৰ বৃদ্ধি হয়,সেই পৰিসংখ্যা আদৰণীয় হ’লেও আমি লক্ষ্য কৰিব লাগিব যাতে অধিক লাভাংশৰ আশাত বিনিয়োগকাৰীৰ মুূলধন ঘূৰাই পোৱাত পাছলৈ সমস্যাৰ সৃষ্টি নহয় ৷ ইয়াক কোৱা হয় Risk vs.Reward বা লাভাংশৰ তুলনাত বিপদৰ সম্ভাৱনা কিমান,তাৰ বিষয়ে এক সম্যক ধাৰণা থকা প্ৰয়োজন ৷ প্ৰায়ে দেখা যায় যে এজন সাধাৰণ বিনিয়োগকাৰীৰ অত্যাধিক লাভাংশৰ বিপৰীতে মূলধন হেৰুওৱাৰ সম্ভাৱনীয়তাৰ বিষয়ে সম্যক  ধাৰণাৰ অভাৱ ৷ উদাহৰণস্বৰূপে কিছু বছৰ আগতে অসম,পশ্চিমবংগ ইত্যাদি ৰাজ্যৰ কেইবালাখ ক্ষুদ্ৰ বা খুচুৰা বিনিয়োগকাৰীৰ সাচঁতীয়া তথা কষ্টপাৰ্জিত ধন সাৰদা গ্ৰুপ,ৰ’জ ভেলী গ্ৰুপৰ দৰে অসাধু বিত্তীয় প্ৰতিষ্ঠানৰ দ্বাৰা হৰলুকী হৈছিল ৷ কম বেছি পৰিমাণে একে কথা ছাহাৰা গ্ৰুপৰ ক্ষেত্ৰতো ক’ব পৰা যায় ৷ এই বিত্তীয় তথা বিনিয়োগকাৰী প্ৰতিষ্ঠান সমূহে ক্ষুদ্ৰ সঞ্চয়কাৰী ,বিনিয়োগকাৰী সকলক উচ্চ হাৰৰ লাভাংশৰ স্বপ্ন দেখুৱাই সাধাৰণ ৰাইজৰ ধন আত্মসাত কৰিছিল ৷ এনেধৰণৰ উদাহৰণ বিশ্বৰ প্ৰায় সকলো দেশতে কম বেছি পৰিমাণে দেখিবলৈ পোৱা যায় ৷ এই ক্ষেত্ৰত অকল যে চৰকাৰৰে কৰণীয় থাকে,তেনে নহয়, সৰ্বসাধাৰণ ৰাইজৰো ফাইনেন্সিয়েল লিটাৰেছি বা বিত্তীয় শিক্ষাৰ প্ৰাৰম্ভিক ধাৰণাৰ যথেষ্ট প্ৰয়োজন আছে ৷ তেন্তে প্ৰশ্ন উথাপন হয় যে বিনিয়োগকাৰীৰ বাবে সঠিক তথা সুৰক্ষিত বিনিয়োগৰ বিষয়ে এজন সাধাৰণ নাগৰিকে কেনেকৈ অৱগত হ’ব ? আমাৰ সমাজত এষাৰ কথা আছে যে এবাৰ সাপে খালে কেচুলৈকো ভয় ৷ সেইবাবেই বিনিয়োগৰ আকৰ্ষণীয় অথচ সাবধানেৰে খোজ পেলাবলগীয়া ক্ষেত্ৰখনৰ বিষয়ে কিছু শৃংখলাবদ্ধ ,প্ৰাৰম্ভিক ধাৰণা অতিকে আৱশ্যক ৷ আনহাতে, একে সময়তে ইয়াকো ক’ব পৰা যায় যে এজন তথাকথিত শিক্ষিত লোক হ’লেই যে ফাইনেন্সিয়েল লিটাৰেছি বা বিত্তীয় শিক্ষাৰ প্ৰাৰম্ভিক ধাৰণা থাকিব ,এনে কোনো কথা নাই ৷ ইয়াৰ বিপৰীতে,এজন তথাকথিত আনুষ্ঠানিক শিক্ষাৰে শিক্ষিত নোহোৱা ব্যক্তিৰো বিত্তীয় শিক্ষাৰ প্ৰাৰম্ভিক ধাৰণা সমূহ থাকিব পাৰে ৷ ইয়াৰ উৎকৃষ্ট উদাহৰণ হ’ল সমাজত আনুষ্ঠানিক শিক্ষাৰে শিক্ষিত নোহোৱা বা অতি কম শিক্ষাৰে শিক্ষিত ব্যক্তিৰ দ্বাৰা ব্যৱসায়ী জগতখনত নিজকে প্ৰতিষ্ঠিত কৰিবলৈ সক্ষম হোৱা কাৰ্য ৷ আনহাতে উচ্চ শিক্ষাৰে শিক্ষিত ব্যক্তি এজন একেসময়তে নিবনুৱা হৈ থাকিব পাৰে ৷ গতিকে কোৱা হয় যে বিত্তীয় শিক্ষা প্ৰকৃতাৰ্থত জীবন সংগ্ৰামৰ শিক্ষা বা ক’মন ছেন্স শিক্ষা ৷ ওপৰোক্ত কথাখিনি এজন সাধাৰণ বিনিয়োগকাৰীয়ে সকলো সময়তে হৃদয়ঙ্গম কৰা উচিত ৷ বিনিয়োগৰ ক্ষেত্ৰখনত সদায় গ্ৰীদ বনাম ফিয়েৰ বা লোভ বনাম সতৰ্কতা / ভয়ৰ মাজত এক অঘোষিত যুদ্ধ চলে ৷এই দুই কাৰকৰ বাবে এজন বিনিয়োগকাৰীৰ মনস্তাত্বিক দিশটো যথেষ্ট প্ৰভাবিত হয় ৷ এই গোটেই বিষয়টোৰ বিষয়ে গভীৰভাৱে অধ্যয়ন কৰিবলৈ সেইবাবে বিহেভিয়াৰেল ফাইনেন্স বা মনস্তাত্বিক বিত্তীয় নীতি নামৰ এক নতুন বিভাগৰ প্ৰায় ৪০বছৰ মান আগতে জন্ম হৈছিল ৷ অৱশ্যে সৰ্বসাধাৰণ বিনিয়োগকাৰীৰ বাবে বিনিয়োগৰ ইমান গভীৰ বিষয়সমুহৰ মাজত সোমোৱাৰ প্ৰয়োজন নাই ৷ এনে জটিল তথা অত্যাধুনিক বিষয়বোৰ হাজাৰ হাজাৰ কোটি টকা এবাৰতে বিনিয়োগ কৰা বিনিয়োগকাৰী সংস্থা বা ব্যক্তিৰ ক্ষেত্ৰতহে প্ৰযোজ্য হয় ৷ সাধাৰণ বিনিয়োগকাৰীসকলৰ সুৰক্ষাৰ বাবে ভাৰতৰ ৰিজাৰ্ভ বেংক,SEBI (Securities &Exchange Board of India),IRDA(Insurance Regulatory & Development Authority) ইত্যাদি বিভিন্ন চৰকাৰী নিয়ন্ত্ৰণকাৰী প্ৰতিষ্ঠান আছে ৷ এই প্ৰতিষ্ঠান সমুহৰ দ্বাৰা স্বীকৃতিপ্ৰাপ্ত বিত্তীয় তথা বিনিয়োগকাৰী প্ৰতিষ্ঠানসমূহ সাধাৰণতে সুৰক্ষিত বুলি ক’ব পৰা যায় ৷গতিকে এজন সাধাৰণ নাগৰিকৰ বাবে বিনিয়োগৰ ক্ষেত্ৰখনৰ বিষয়ে সম্যক ধাৰণা হোৱাৰ পৰৱৰ্তী পদক্ষেপ হৈছে সম্ভাব্য বিত্তীয় বা বিনিয়োগকাৰী প্ৰতিষ্ঠানৰ বিভিন্ন চৰকাৰী নিয়ন্ত্ৰণকাৰী প্ৰতিষ্ঠানৰ দ্বাৰা স্বীকৃতিৰ বিষয়টোৰ বিষয়ে অনুসন্ধান কৰা ৷ এই পদক্ষেপ জটিল বুলি ভাৱিলেও দৰাচলতে ই এক সহজ পদক্ষেপ ৷ বিত্তীয় বা বিনিয়োগকাৰী প্ৰতিষ্ঠানৰ ওচৰত বিচাৰিলেই এই স্বীকৃতি প্ৰাপ্তিৰ বিষয়টো জানিব পৰা যায় ৷ তাৰোপৰি প্ৰতিষ্ঠানটোৰ ৱেবছাইটত বিভিন্ন চৰকাৰী নিয়ন্ত্ৰণকাৰী সন্থাসমূহৰ পৰা প্ৰাপ্ত স্বীকৃতিৰ কথা উল্লেখ থাকিবই ৷ সততে কোৱা হয় সাৱধানীৰ মৰণ নাই ৷ এই আপ্ত বাক্যশাৰীক সাৰোগত কৰি বিনিয়োগকাৰীসকলে পৰৱৰ্ত্তী কি পদক্ষেপ লোৱা উচিত,সেই বিষয়ে পৰৱৰ্ত্তী খণ্ডত আলোকপাত কৰা হ’ব ৷